Lu novu Municipiu

(L’innagurazzioni)

di Totò Varone

Si nchianàti jà ssupa a lu Cumùni

li littari attaccati chi viditi

sù giustu comu chiji a li salùni

chi nc’nnu ntra li filmi di banditi

Nu sceriffu nci manca ntra l’entrata

m’abberti l’assessori a lu principiu

pe nommu fannu cchiù carchi cazzàta

comu fudi a lu vecchiu Municipiu

d’undi cacciaru littari abbronzati

chiaru signu di storia seculari

chi no si sa se sugnu sutterrati

comu tandu fu pe l’aquila reali

Lu sindacu avi mu pigghia nu frustinu

mu cumincia a minari a scropatuni:

‘a mu capisci ca ogni cittadinu

oramai ndavi rutti li… palluni

ca st’Amministrazioni è nsonnuluta

di lu populu sempi s’alluntana

ca fa cultura sulu pe viduta

comu la fici mo’ cu la “Batana” (*)

(*) Dal titolo di un libro presentato recentemente in Mediateca